ياشلىق ۋە ئوقۇش ھاياتى

مەرھۇم ئابلىز ئابدۇلھەق (تەخەللۇسى: ئىزچىمەن، بوران) 1950-يىلى تۇرپان ۋىلايىتى توقسۇن ناھىيەسىنىڭ ئاقتاش رايونىدا دىندار بىر ئائىلىدە دۇنياغا كەلگەن. ئۇ باشلانغۇچ ۋە ئوتتۇرا مەكتەپنى ئۈرۈمچى 5-ئوتتۇرا مەكتەپتە ئوقۇپ پۈتتۈرگەن. كېيىن 1972-يىلىدىن 1976-يىلىغىچە شىنجاڭ ئۇنىۋېرسىتېتى خىمىيە فاكۇلتېتىدا ئوقۇغان. 1982-يىلىدىن 1984-يىلىغىچە تيەنجىن نەنكەي ئۇنىۋېرسىتېتى خىمىيە فاكۇلتېتىدا بىلىم ئاشۇرغان.

خىزمەت ۋە سىياسىي ھاياتى

ئۇ 1976-يىلىدىن 1980-يىلىغىچە شىنجاڭ پەنلەر ئاكادېمىيەسىدە پەن-تېخنىكا تەرجىمانى، 1980-يىلىدىن 1993-يىلىغىچە شىنجاڭ پېداگوگىكا ئۇنىۋېرسىتېتىنىڭ خىمىيە فاكۇلتېتىدا لېكتور بولۇپ ئىشلىگەن. مىللىتىگە بولغان سۆيگۈسى سەۋەبلىك، 1989-يىلى 19-مايدا ئۈرۈمچىدە يۈز بەرگەن ئوقۇغۇچىلار نامايىشىغا قاتنىشىپ تۇتقۇن قىلىنغان ۋە ئوقۇتقۇچىلىق ۋەزىپىسىدىن ئېلىپ تاشلانغان.

مۇھاجىرەت ۋە ئىجادىيەت

ۋەتەندىكى بېسىم سەۋەبلىك، ئۇ 1993-يىلى قازاقىستانغا، ئاندىن 1994-يىلى تۈركىيەنىڭ ئىستانبۇل شەھىرىگە كەلگەن. ئۇ مۇھاجىرەتتىكى ھاياتىدا ئۇيغۇرلارنىڭ ئەركىنلىكى ئۈچۈن نەزەرىيەۋى ئىزدىنىش ئېلىپ بېرىپ، ئون پارچىدىن ئارتۇق كىتاب ۋە ئەسەرلەرنى يازغان ھەم تەرجىمە قىلغان. ئۇنىڭ قەلىمىگە مەنسۇپ بولغان «مۇستەقىللىقىمىزدا ئۈمىد بارمۇ؟» قاتارلىق ئەسەرلىرى ئۇيغۇر خەلقىنىڭ قەلبىدە چوڭقۇر ئىز قالدۇرغان.

ۋاپاتى

ئۆمرىنى مىللىتىنىڭ مەنپەئەتى ۋە بىلىمگە بېغىشلىغان بۇ قەيسەر زىيالىي 2023-يىلى 1-ئاينىڭ 20-كۈنى 73 يېشىدا تۈركىيەنىڭ تېكىرتاغ شەھىرىدە ئالەمدىن ئۆتتى. ئۇنىڭ ئىدىيىسى ۋە يازمىلىرى مەڭگۈ ياد ئېتىلىدۇ.